Algjör Sveppi – Dagur í lífi stráks
26.02.2010.
Út er komin frábær ný barnaplata með lögunum úr leiksýningunni Algjör Sveppi – Dagur í lífi stráks. Leikritið er sýnt í Íslensku Óperunni um þessar mundir og hefur hlotið stórfínar viðtökur bæði áhorfenda og gagnrýnenda.
Sýningin er byggð á barnaplötu Gísla Rúnars Jónssonar, Algjör sveppur, og er leikstýrt af Felix Bergssyni en Jón Ólafsson sá um upptökustjórn á tónlistinni. Það er leikarinn Sverrir Þór Sverrisson, betur þekktur sem Sveppi, sem fer með aðalhutverkið og gerir það af sinni alkunnu snilld. Hinn leikari sýningarinnar er Orri Huginn Ágústsson. Platan inniheldur öll lögin sem er að finna í sýningunni og á vafalaust eftir að vekja mikla lukku hjá yngstu kynslóðinni.
Thorbjörn Egner - Gömlu góðu barnaleikritin á 4 geislaplötum.
25.02.2010.
2. mars kemur út safnkassi með 4 vinsælum leikritum eftir Thorbjörn Egner. Leikritin eru Kardimommubærinn, Karíus og Baktus, Dýrin í Hálsaskógi og Síglaðir söngvarar.
Plöturnar innihalda gömlu góðu upptökurnar sem allir kannast við og má segja að þær eru með vinsælustu plötum íslenskrar útgáfusögu. Ætla má að þessar fjórar plötur hafi samtals selst í rúmlega 100.000 eintökum og eru Kardimommubærinn og Dýrin í Hálsaskógi með mest seldu plötum Íslands.
Pottþétt 51 kemur út 3. des.
30.11.2009.
Nýjasta safnplatan í Pottþétt röðinni vinsælu kemur út 3.des. Á plötunum er að finna flest af vinsælustu lögum dagsins í dag. Á Pottþétt 51 eru 14 lög með íslenskum flytjendum. Á plötunni eru 4 ný jólalög með Ingó, Sigurði Guðmundssyni og Memfismafíunni, Baggalút og Hvanndalsbræðrum. Aðrir íslenskir flytjendur eru: Hjálmar, Feldberg, Biggibix, Jógvan, Lára Rúnarsdóttir, Haffi Haff, Ingó og Veðurguðirnir, Hjaltalín, Hafdís Huld og Fjallabræður ásamt Magnúsi Þór Sigmundssyni. Meðal erlendra flytjenda á plötunum eru: Gossip, Lily Allen, The Black Eyed Peas, Robbie Williams og Lady Gaga. Pottþétt 51 er 89. Pottþétt platan í Pottþétt útgáfuröðinni sívinsælu.
Ríó tríó sendir frá sér jólaplötu.
27.11.2009.
Þeir Helgi Pétursson, Ólafur Þórðarson og Ágúst Atlason, Ríó tríó, hafa í áranna rás sent frá sér nokkur vel heppnuð jólalög. Sá draumur hafði lengið blundað í þeim félögum að gefa út heila plötu eingöngu með jólalögum. Því var ráðist í það verk nýlega að hljóðrita fimm ný jólalög, þar af þrjú eftir þá félaga sjálfa, til viðbótar þeim eldri. Afraksturinn kemur nú út á geislaplötu og er bráðgóður. Á plötunni Gamlir englar – Sígildir á jólum, er að finna öll eldri jólalög Ríó ásamt 5 nýjum lögum. Plata sem kemur þér í frábært jólaskap enda Ríó þekktir fyrir að vera “léttir yfir jólin.”
Jóhann G sendir frá sér plötuna "Á langri leið"
27.11.2009.
Komin er út fjórða sólóplata Jóhanns G. Jóhannssonar „Á langri leið“. Á plötunni eru 10 lög sem ekki hafa komið út áður og syngur Jóhann sjálfur öll lögin á plötunni en söngkonan Regína Ósk er til aðstoðar í röddum. Vinnsla plötunnar hófst í maí á þessu ári og hafði Pétur Hjaltested yfirumsjón með gerð hennar.
Stefán Hilmarsson sendir frá sér plötuna Húm
23.11.2009.
Stefán Hilmarsson hefur sent frá sér sína fimmtu sólóplötu. Margir af fremstu lagasmiðum landsins lögðu Stefáni til lög og óhætt er að segja að platan sé uppfull af gæðatónlist. Meðal þekktra höfunda sem eiga efni á plötunni eru Gunnar Þórðarson, Jóhann G. Jóhannsson og Magnús Þór Sigmundsson, auk Stefáns sjálfs, en öll umgjörð og flutningur er sannarlega fyrsta flokks.
Þrátt fyrir að hafa staðið á sviðinu í rúma tvo áratugi hefur Stefán vaxið mjög hin síðari ár sem söngvari og virðist eiga mikið inni ennþá. Rödd hans hefur þroskast eins og vandað franskt rauðvín og aldrei hefur hann sungið betur en á þessari plötu, sem er án tvímæla besta verk Stefáns til þessa.
Jólagestir Björgvins í Höllinni 2008 (CD+DVD).
20.11.2009.
Út er komin einstaklega glæsileg útgáfa á mynddisk og hljómdisk frá frábærum tónleikum Jólagesta Björgvins fyrir troðfullri Laugardalshöll í desember sl. Geislaplatan inniheldur 20 lög frá tónleikunum en mynddiskurinn geymir tónleikana í heild sinni. Að venju var afar gestkvæmt á sviðinu hjá Björgvini og meðal þeirra sem stigu á stokk voru margir fremstu söngvarar landsins auk barnakórs, 16 manna strengjasveitar, karlakórsins Voces Masculorum, barnakórs Kársnesskóla og stórhljómsveitar Björgvins undir stjórn Þóris Baldurssonar.
Sveitin milli sanda er komin út.
19.11.2009.
Friðrik Karlsson og Þórunn Lárusdóttir slógu eftirminnilega í gegn árið 2006 með plötunni Álfar og fjöll sem seldist í 7 þúsund eintökum. Á plötunni voru þekkt íslensk dægurlög sett í mjög afgerandi stíl sem þjóðinni féll greinilega vel. Á þessari nýju plötu er haldið áfram þar sem frá var horfið á hinni fyrri. Söng- og leikkonan frábæra Jóhanna Vigdís Arnarsdóttir, Hansa, hefur tekið við sönghlutverkinu en Friðrik Karlsson er enn við stjórnvölinn.